ഹരീഷു പാടുന്നു ജമുനാകിനാരേ
ഹരീഷു പാടുന്നു ജമുനാകിനാരേ
കറുത്ത കണ്ണട വഴികാട്ടിയാം വടി
ഹാര്‍മോണിയത്തില്‍ വിരലുകള്‍ തപ്പുമ്പോള്‍
ആരോഹണങ്ങളില്‍ അവനു കാഴ്ച
ഹരീഷു പാടുന്നു ജമുനാകിനാരേ
മേഘങ്ങള്‍ക്കു മുകളിലായ്‌
ആകാശത്തിനപ്പുറത്തായ്ഞാന്‍ പറക്കുന്നു
ഹരീഷു പാടുന്നു
ഞാന്‍ കണ്ണടച്ചിരിക്കുന്നു
ഞാന്‍ ഞാനാകുന്നു
ഞാനപ്പൂപ്പന്‍താടിയാകുന്നു
ഹരീഷു പാടുന്നു
താഴേക്കുമുയരെക്കുമാട്ടിയുമിറക്കിയും
താളങ്ങളില്‍ ബ്രഹ്മതാണ്ഡവം കാട്ടിയും
തെന്നലില്‍ തിരമാല കെട്ടഴിച്ചും
തേങ്ങലില്‍ തോടിയും ശ്രീരാഗവും
തെന്നലില്‍ തിരമാല കെട്ടഴിച്ചും
തേങ്ങലില്‍ തോടിയും ശ്രീരാഗവും
ഹരീഷു പാടുന്നു
കണ്ണിറുക്കിക്കൊണ്ട് താഴ്ന്നുമുയര്‍ന്നുംഞാന്‍
തന്മാത്രയായെ പറന്നെയിരിക്കുന്നു
ഹരീഷു പാടുന്നു
തുംഗങ്ങളില്‍നിന്ന് താഴേക്കു നോക്കുമ്പോള്‍
അമ്പരിപ്പിക്കാത്ത താഴ്വരക്കാഴ്ചകള്‍
കണ്ണിറുക്കിക്കൊണ്ട് താഴ്ന്നുമുയര്‍ന്നുംഞാന്‍
തന്മാത്രയായെ പറന്നെയിരിക്കുന്നു
ഹരീഷു പാടുന്നു
നീയന്ധന്‍ ഞാനോ മഹാകൂരിരുട്ടത്തു
കാണുവാന്‍ പേരിന്നു കണ്ണുള്ളവന്‍
നീയന്ധന്‍ ഞാനോ മഹാകൂരിരുട്ടത്തു
കാണുവാന്‍ പേരിന്നു കണ്ണുള്ളവന്‍
നീ ഗായകന്‍ മഹാ തേജസ്സില്‍
അല്പം പകര്‍ന്നുജ്ജൊലിപ്പവന്‍
നീ ഗായകന്‍ മഹാ തേജസ്സില്‍
അല്പം പകര്‍ന്നുജ്ജൊലിപ്പവന്‍
ഞാന്‍ ഇന്ദ്രിയങ്ങളാല്‍ പൂര്‍ണന്‍
ഒരൊറ്റനാള്‍ ജീവിതം തവണകള്‍ പോലെ
ഒടുക്കിയൊടുക്കുവോന്‍
ഒരുപോലെ ദുഖം ഒരേചിരിച്ചന്തം
ഒരുപോലെ വാല്‍സല്യം
ഒരുപോലെ കാമം
ഒരെയുറക്കം ഒരേ പ്രഭാതം
ഒരുപോലെ ഉണ്ണല്‍ ഉറങ്ങല്‍ ഉലാത്തല്‍
ഒരുപോലെ ഭോഗം ഒരുപോലെ ധ്യാനം
ഒരുപോലെജനന മരണാന്തപ്രവൃത്തികള്‍
ആവര്‍ത്തനങ്ങള്‍ മടുക്കുമ്പോളാണെന്‍റെ
ആത്മബോധങ്ങളില്‍ നിന്റെ സാനിധ്യം
ആവര്‍ത്തനങ്ങള്‍ മടുക്കുമ്പോളാണെന്‍റെ
ആത്മബോധങ്ങളില്‍ നിന്റെ സാനിധ്യം
സൂക്ഷ്മമാമാത്മാവിലൂര്‍ന്നിറങ്ങും
നിന്റെ പാട്ട് നിര്‍വ്വാണാംശദര്‍ശനം
എന്നെ നായിക്ക് നീ
ഈയിരുട്ടത്തെന്റെ മുന്‍പേ നടക്കു
വെളിച്ചമായ്‌ വാക്കായി
ഈയിരുട്ടത്തെന്റെ മുന്‍പേ നടക്കു
വെളിച്ചമായ്‌ വാക്കായി
0 comments:
Post a Comment